Tripudij di Barba Giròni pel nato figlio (L'ha na gòj barba Giròni)

L'ha na gòj barba Giròni
ch'a fà 'd sàut com un cravieul:
sui trant agn 'd sò matrimòni
finalment a l'ha avù un fieul.

Për piasì ch'lo-lì ha faje
(fur da rije da crëpé)
an sautand s-ciancher le braje,
ch'a-j drochero giù sui pé.

Òh che bele trebaudëtte
ch'a-j han faje ij seu vësin
con le mòle e le palëtte
sul paireul e sui bronzin.

A-j han fàit una sparada,
ch'a smijava giust 'd mortrat;
ma l'é stàit una sarnada
fàita a fòrsa 'd rut e 'd pat.

A sà nen còsa së fassa,
tant as treuva conturbà;
basta dì ch'ander an piassa
sensa braje con la spà.

A-j sforgion-a 's panadasse
minga pòch ant un concat
dle pì bon-e e dle pì grasse
fàite tute al breu 'd zampat.

A-j ha già massà na pola,
ch'a l'avìa quìndes agn;
ma për fé borboté l'ola
l'ha brusà fin ij cavagn.

L'ha fità la sòma dl'òsta
bòrgna, sòpa e sensa dent,
për mandé 'l sotror an pòsta
dene part ai seu parent.

Son vënù vestì da festa
tuti quanti a feje onor,
sensa càusse e nen an testa,
scarpentà com 'd sfrosador.

Ognidun as é studiasse
për porteje quàich present:
chi 'd povron e chi 'd lumasse,
chi 'd faseuj, chi 'd pom rusnent.

Slanfrinaja 's é godusse
ch'a l'é peui la pajolà,
gnanch për seugn s'era credusse
'd vëddse a fé tanta onestà.

A-i é andaje doe ciòrgne
për baileje col fiolin;
un-a ha le pupe bòrgne,
l'àutra l'é sensa mimin.

Venta vëdde pesse e fasse
travajà con tuti ij fiòch:
con tre tèile da pajasse,
ch'a tajer an tanti tòch.

L'ha dàit man a un pàira 'd braje,
ch'a portava ai di 'd lavor,
s'angigner, a-j ha dësblaje,
n'ha gavane un cuertor.

Con sò spìrit s'é butasse
për voleje fé un cunòt,
e talment as é aplicasse
che a l'ha reussì un sëbròt.

As é pijasse për compare
mëssé Giòrs 'l cartoné,
con Argnasca për comare,
la cugnà dël traponé.

La marin-a a-j ha portaje
në scufiòt dij pì famos;
basta dì ch'a-j ha costaje
una bon-a pugnà 'd nos.

Con la tòrcia 'd sira giàuna
già scrussìa a tut andé,
ma gropà tut giù con 'd càuna
son partisse andé a batié.

Quant al nòm a consultero,
quand a furo për camin;
finalment a concordero
a buteje nòm Martin.

Tut 'l mond për lì surtìa
a buché sta prossession,
e Giròni 's n'andasìa
rèid e fier com un piston.

Una ciabrassà parìa
da la sima fin al fond
ant col leu 's é mai sentìa
gnanch da peui che 'l mond é mond.

L'arsiprete ch'ha batialo
l'ha tirà soa stuca apress;
mëssé Giòrs l'ha regalalo
d'una pessa 'd doi e mes.

É-la pa na bela stren-a,
ch'a l'ha avù la pajolà
d'una tasca bel e pien-a
ëd castagne brusatà?

Ma sentì fra j'àitre mance
cola-lì dla levatris;
a-j han daje sensa ciance
da compré na lira 'd ris.

Col ch'a l'ha portà la tòrcia,
l'ha pa fàit sò viagi an van,
l'ha pa avù na stren-a splòrcia;
Ch'a-j han dàit na mica 'd pan.

Ma venomo a le batiaje
për sentì quàich còsa 'd bel;
quanta ròba ch'a-i é staje
tut parià su un grand tinel.

Prima a-i fur na bela ambòsta
tra luin e tra ravòt;
ch'ero acomodà an compòsta
con 'd cocómer e 'd cossòt.

Peui na bela polentassa,
ma tajà tuta a listin,
ch'a fasìo na minassa
ch'a smijavo bëscotin.

Lò ch' fer gòj a la brigada
fur un mass 'd bej ravanat,
con un bel gaviòt 'd salada
tuta 'd pleuje 'd fasolat.

Peui mandero a l'ostarìa
fé porté un bocal 'd vin,
e la festa fur finìa
dòp avèje cimpà bin.